መኣዳ ወዲኣ … ናይ ሎሚ በሊዓ

ንእዋን ቀጺዓ …  ንጽባሕ ወጺዓ

ትርአ ከሲዓ።

መን ይብልዋ’ዚኣ … ክትፍክር ተጠሊዓ

ላሕቲቱ ጎሮሮኣ … ሓጒቡ ሕቖኣ

ናይ ሕጂ ወጽዓ … ከይተሰመዓ

ግርም ኣለኹ ትብል ኮሪዓ።

ሃየ በሊ ሎሚ …. ተመሃሪ ተመከሪ

ካብ ትማሊ

ተማልኢ ፍዮሪ … ዝወልድ ዝፈሪ።

ኣስተውዕሊ … ኣስተባህሊ

ሸተት ከይትብሊ … ብዝረገፈ ቆጽሊ

ብናይ ትማሊ … ኣሳሒታ ቁሪ

መደናገሪ’ዩ … ንውዑይ ዘላሊ

ንንኡስ በራሪ።

በዓል ቤታ ንሕጂ … ዝናጠር ከም ፈንጂ

ዝመራመር ከም ፈረንጂ

ንጽባሕ ዝኸውን ዝተክል ዓንዲ

ግራት መስተርሆት ዘጸብቕ ዘቖንጂ።

በሊ ‘ትማሊ’ … ንሰብኪ ምሰሊ

ተቐየሪ …. ተመሃሪ

ብጉራ ብዝና ኣይትተሃመሊ

ተመስገን ምባል የብሉን ነውሪ።

ደሓር ከይትድፈሪ

ብናይ ለውጥ ሓለንጊ ከይትሕመሊ።

ምናልባት!

እንተረፊዱ ምድሪ

እንተ ተጸንቂቑ ዓቕሊ

ምጉሓፍ’ወን ኣሎ ብዘይቀብሪ።

ጨው ቀትሪ

ኣብ ምድረ በዳ ኣብ ቁሪ

ከም ናይ ትሩቡሊ

ሓመድ ኣዳም ዘንፍግ ግብሪ

ከይልክመኪ ተለመኒ

በጃኺ ‘ትማሊ’

ምስ እዋን ተዋስኢ .. ተበራበሪ

ንለውጥን ዕርቅን ርዒምኪ ሕደሪ።

ዳንኤል ተስፋዮውሃንስ ተኽለጊዮርጊስ።

(11 – 06 - 11)

This email address is being protected from spambots. You need JavaScript enabled to view it.