ገና ብንእስነቱ - ሓንጎሉ በሲሉ
ብምሒር ሽግር - ጎኑ ተሪሩ
ሓላፍነት ገዛ - ወዲቑ ኣብ ሕቑኡ
ክብል ላዕልን ታሕትን - ክሕግዝ ኣዲኡ

ቆሎ ፉል ጥጥቖ - ቀንጠ መንጢ ሸቐጥ
ዝጸንሐት ቤተሰብ - መኣዲ ‘ንተረኸበት
ምሳሕ ‘ንተተረፈ - ድራር ክትዕንገል
ኣዲኡ ሓሚመን - ፍጹም ተደኒሰን
ብብርቱዕ ሓዘን - ዘይምሱል መሲለን

ዓራት ካብ ዝሕዛ - ድሮ ኮይኑ ዓመት
ሓፍቱ’ውን ፈቲና - ክትሰግር ብባሕሪ
ኮይና ግን ተሪፋ  - ድራር ዓሳ ነባሪ
ተባዕትዮ የሕዋቱ - ሃለዋቶም ጠፊኡ
መጽሓፍ ቅዱስ - ሒዞም ምስ ተረኸቡ

ንኣሽቱ የሕዋቱ - ጸባ’ኳ ኣይጸገቡ
ኣቡኡ ተበጅዩ - ምእንቲ ሃገሩ
ልዕሊ ዓጽሚ ኣቡኡ - ካልኦት ይዕንድሩ
ወዲ ስዉእ ግና - ጠምዩ’ሎ ተደርብዩ
ፈቐዶ ቤት ማሕቡስ - ኮይኑ’ሎ ናብርኡ

ንግሆ ወጺኡ - ምምላሱ ምሸት
ጠራኒፉ ቅሩብ - ዝተረኽበ መኽሰብ
ዘይመለአ’ኳ ዓሰርተ - ኣላዪ ቤተሰብ
ኣደራዕ ወሪድዎ - ከይጸገበ ንእስነት
ንብዓት ዝሓዘለ - መበረታትዒ ቃል
ኣንደበት ኣደ - ክኣሎ’ዚ ወደይ