“ሓሊፍዎ ንመንግስቱ”

ኣንታ እዚ መራሒና
ሕልፍ እምበር ኢልዎ ንመንግስቱ…
ጽባሕ ጕንበት እኮ’ዩ ከኽብር…
ዓሰርተ-ሸሞንተ ዓመቱ…

ኣንታ እዚ ገዛኢና…
ካን እምበር ቀዲምዎ ንመንግስቱ…
ጕንበት 24’ዩ እኮ ክኽብር
ጽምብል ሓርነቱ…

    ሙዃን ከኣ….

ቀበሌ ዶ ከይሰንፎ ንድኳን ርትዒ…
ዕራዒሮ ዶ ከይሓምቖ ንማሪያም ግቢ….
ውትድርና እውን ተሰምዩ ኣሎ ኣገልግሎት
ባርነት ዶ ከይንእሶ ነቲ ናጽነት…

እኽሊ ምስ ከልኤ ንሸመተ…
ትልኽ ይብል ኣሎ ዘይረሃጸሉ ቖፎ እንዳዘመተ…
ኣዕንቱ ኣፍጢጡ በዚሑ ዝዕመተ…
ገና ድማ ይዘልል ኣሎ ብደው እንዳሞተ…

ኣኽራናት ዓደይ ዕልል በሉ ዕልል በሉ
ጕንበትሲ መጺኣ ኣላ ብሓጎስ ደብሉ…

ኮረቢት ዓደይ ኣሰና በሉ ኣሰና በሉ
24 ደብኽ ኢላ ብሓጎስ ዝለሉ…

እንተ እቲ ሰብ እሞ
ሕጂ ዶ ደንጎላ ተመሲሉ…
ባርነቱ ክጽምብል….
ናጽነት ኣምሰልሲሉ…
 

ንምንታይ መራሒና ጠሊሙ እትብሉ
ንሱስ ዓስቢ ገድሉ’ዩ ዝቝርጥም ዘሎ
ደማሙ ኣኻኺቡ

ገዛኢና በዲሉ ኣይትበሉ…
ዘደየብኵሙሉ ወንበር ዶ
መውረዲ ትስእንሉ…

ኤርትራ ዓድና ዘይሓልፈላ
መንግስቱ እምበር ተኺላ
መንግስቱ ኣባሪራ…

 “ ሉዑላዊነት ሃገር ብዘይ ሉዑላዊት ሕዝቢ ትርጕም ኣልቦ’ዩ”

ኪሮስ ዮውሃንስ