ናይ ስዊስ መንግስቲ ኣብ ልዕሊ ኤርትራ ናይ ኣጽዋር እገዳ ክገብር ወሲኑ።

ብድሕሪ ናይ ሕ.መ. ቤት ምኽሪ ጸጥታ ዝሓለፈ ውሳነ መሰረት ናይ ስዊስ መንግስቲ ኣብ ልዕሊ ኤርትራ ናይ ኣጽዋር እገዳ ክገብር ወሲኑ።

ብዝሓለፈ ታሕሳስ ናይ ሕ.መ. ቤት ምኽሪ ጸጥታ ነዚ ውሳነ እዚ ዝበየኖ ምኽንያት፣ ኤርትራ ነቶም ኣንጻር ናይ መንግስቲ ሶማል ዝኾኑ ሑሉፋውያን እስላም ኣጽዋር ተዕጥቕ ኣላ ብምባልን ከምኡ እውን ናይ ዶብ ባእሲ ምስ ጎረቤታ ዝኾነት ጁቡቲ ንኽትፈትሖ ድልውቲ ብዘይ ምዃና እዩ።

ናይ ሃገረ ስዊስ እገዳ ብሓሙስ (ሎሚ 2/4/2010) ኣብ ግብሪ ክውዕል እዩ። እዚ ንናይ ኣጽዋር መሸጣን፣ ሰደድን ኩሉ ዓይነት ናይ ጠያይቲ መሰል ናውቲ ኣጽዋር ከምዝምልከት ናይ ቁጠባ ሚኒስትሪ ኣብ ዝሃቦ መግለጺ ኣፍሊጡ። ምስዚ ንወተሃድራዊ ንጥፈታትን ናይ ኣጽዋር ዝሕግዝ ፊናንሲያዊ መስርሕ (ናይ ገንዘብ) እውን ከምዝተኸልከለ ገሊጹ።  

“ኤርትራ ንናይ ሶማል ተቐናቐንቲ ጉጅለታት ብምሕጋዛ ኣብቲ ከባቢ ንዝገበር ናይ ሰላም ርግኣትን ፈተን ኣብ ሓደጋ ተወድቕ ኣላ” ይብል እቲ መግለጺ። ብተወሳኺ ንናይ ጁቡቲ ናይ ዶብ ምስሕሓብ ጉዳይ እውን ጠቒሱ።

እቲ ሚኒስትሪ ከምዝብሎ፣ ኣብ ዝሓለፈ 10 ዓመታት ሃገረ ስዊስ ንኤርትራ ናይ ስዊስ ፍራንክ 60,000 ($ 57,000) ዝግመት ናይ ተተኮስቲ ንዋት ጥራሕ እያ ሰዲዳ። እዚ ድማ ብናይ ሕ.መ. ህጹጽ ናይ ተተኮስቲ ዝሕግዝ ጉጅለ ኣብ ኤርትራ ኣቢሉ እዩ ተኻይዱ።

ምንጪ፤ swissinfo.ch and agencies