ኤርትራ ምስ ሕቡራት መንግስታት ኣመሪካን ዓለማዊ ማሕበረሰብን ርክባ ንከተመሓይሽ ጸቢብ ዕድል ጥራይ ተሪፍዋ ከምዘሎ፡ ኣምባሳድር ሱዛን ራይዝ ኣፍሊጣ።

ኤርትራ ምስ ሕቡራት መንግስታት ኣመሪካን ዓለማዊ ማሕበረሰብን ርክባ ንከተመሓይሽ ጸቢብ ዕድል ጥራይ ተሪፍዋ ከምዘሎ፡ ኣብ ውድብ ሕቡራት ሃገራት ኣምበሳድር ሕቡራት መንግስታት ኣመሪካ ሱዛን ራይዝ ኣፍሊጣ።

ኣምባሳድር ራይዝ ብረቡዕ 29 ሓምለ ንቤትምኽሪ ኮሚቴ ጉዳያት ወጻኢ ሕቡራት መንግስታት ኣመሪካ ኣብዘቕረበቶ ጸብጻብ፡ “እንተደኣ ኤርትራ ኣካይዳኣ ከምዘመሓየሸት ኣብ ሓጺር ግዜ ምልክት ዘይርኢና፡ ብሰሪ እቲ ኣብ’ቲ ከባቢ ትፍጽሞ ዘላ ናይ ምህዋኽ ሸርሕታት፡ ምስ ኣፍሪቃውያን መሓዙትናን ምስ ባይቶ ጸጥታን ብሓባር ኣድላዪ ስጉምቲ ክንወስደላ ኢና’’ ብምባል ተሪር መተሓሳሰቢ ኣስሚዓ።

ኣስዒባ ኣምባሳድር ኣመሪካ ኣብ ውድብ ሕቡራት ሃገራት ሱዛን ራይዝ፡ ኤርትራ ኣብ ሶማል መጥቃዕትታት ንኽፍጸም ንኣ'ሸባብን ካልኦት ኣኽረርቲ ሓይልታትን ተዕጥቕ፡ ትሕግዝን ትምውልን ከምዘላ ብምግላጽ፡ እዚ ፍጻሜ እዚ ንሕቡራት መንግስታት ኣመሪካ ኣዝዩ ከምዘተሓሳሰባን ከምዘቖጥዓን ኣፍሊጣ። “ነዚ መልእኽቲ እዚ ብኣዝዩ ቀጥታዊ መንገዲ ንመራሕቲ ኤርትራ ከነብጽሕ ፈቲንና ኢና’’ዝበለት ኣምባሳድር ራይዝ፡ መራሕቲ ኤርትራ ግን ብቕንዕና ክቕበልዎ ከምዘይከኣሉ ሓቢራ።

ምስ'ዚ ኣብ ዝተኣሳሰር ዜና፡ ኣመሪካ ተልእኾ ዓቃብ ሰላም ውድብ ሕቡራት ሃገራት ከዘይትድግፍ ብምሕባር፡ እቲ ዓቢ ህዝባዊ ተቐባልነት ረኽቡ ዘሎ ሓይሊ ዓቃቢሰላም ኣፍሪቃዊ ሕብረት ዝበለጸ ኣማራጺ ምዃኑ ኣፍሊጣ።

ኣፍሪቃዊ ሕብረት 4300 ዓቀብቲ ሰላም ኣብ ሶማል ከምዘለውዎ ዝፍለጥ ኮይኑ፡ ኣብ ልዕሊ ኤርትራ ስጉምቲ ክውሰድ ናብ ውድብ ሕቡራት ሃገራት ጠለብ ምቕራቡ ይፍለጥ።