መጋረጃ ይቀንጠጥ 24፡ ንኽብሪ ዉጻእ መዓት መሪሕ ፍትዊ፡

መሪሕ ህጻን ረኺቡ ጸበባ

ደገ ወጺኡ ተዲፊኡዎ ኣልባ

ሃንደበት ሸፈንዎ ብጀለብያ ዓለባ

ድምጺ ዘይብሉ ተኸዲኑ ግርባ

ተሰቅለ መኪና ማንም ዘየርክባ

ተወሰደ ንሲና ኣውያት ዝዓንበባ

ተሓወሰ ድኣ ናብ ሲኦል ዝኸበባ

ምድረበዳ ሲናይ ብንብዓት ዘቕቢባ

መህለቒት ጽጉማት ዓባይ እምባ

መንእሰይ ኤርትራ ዓቕሉ ዘጽበባ

ኣእዊኻ ዘየሳምዕ ኹርባ ምርባ

መቀጸሊ ሂወት ንብዓል ኤባ

ተጠብሔ ዓይኒ ኩላሊት ኮነ ልባ

ይሽየጥ ብነፋሪት ወይ ብጃልባ

ኣደ ኤርትራዊት ረኻቢት ጸበባ።

ወዲ ኣይተ ፍትዊ ስሙ መሪሕ

ተጸሚሙ ኣሕሊፍዎ ዘይፈርሕ

ዉጻእ መዓት ኢኻ ህላወናኻ ዝመርሕ

ንሕጂ ትመስል ትርኢትካ ዘፍርሕ

ብተስፋ ንጽበ ኣካላትካ ክሰብሕ።

እንታዩ ሓጥያቶም ብዓል መሪሕ

ወዲ ሰብ ክጭክን ስራሑ ዘሰኽሕ

ኣእምሮ ህግደፍ ንኽፋእ ዝበልሕ

ስራሓቶም ኩሉ ንዓለም ዘፍርሕ

ኣስመራ ኮይኑ ንኹሉ ዘሰክሕ

የጽንት ንህዝቡ ብዘይ ገለ ክምሕ።

ግዱስ ኤርትራዊ ንመሪሕ ርኣዮ

ኣየድልን ጃህራ ሽግሩ ስምዓዮ

ክደጋገም ሓሶት ኣይኮነን ሓቂ እቲ ዕዮ።

ወገንካ ክሳቐ ጸገም ኣለልዮ

ሸፋቱ ክሰርዑ ሕጊ ኣናድዮ

ንየማን ንጸጋም ዘሎ ፈላልዮ

ጸበባ ዓድኻ ደኒንካ ስምዓዮ።

መሪሕ ፍትዊ ረኻብ መከራ

ህጻን ክዓቢ ነበረ ዓላማ ኤርትራ

ዝኹሉ መስዋእቲ ዘየርኢ ጩራ

ፈቐድኡ ይስጣሕ ኣብ ስሃራ

ገለን ይብላዕ ብሑጻ ወይ ብኣሞራ

እዚ ኩሉ ይፍልፍል ብደቂ ኣስመራ

ኮይናዶ! ጸነተት ሃገራና ኤርትራ።

ምስክር እኒሄልና ንርኤ ብዓይንና

መሪሕ እንታይ ጸገሙ ኣብዚ ቕድሜና

ሓላዊን ኣላይን ጠፊእዎ ዓድና

ብዓል መሪሕ ተበጅዮም ንሃገርና

እዚ’ዩ መንነት ዘስካሕክሕ ኩልና

“ንሕና ንሱ- ንሱ ንሕና” ደርፊ ዓድና

እዚ እናራ ኣያ ማእምናት ሃገርና

ህዝበን እናበረሰ ብመርፍእ ዝቑነና

ኣየ ግዜ እንታይ ከርእየና።

መሪሕ ወደይ መምህር ናይ ኩልና

ብጸገምካ ምስ ዓለም ኣፍለጥካና

ተጻሒፉ ኣይውዳእን ጸገማትና

ዝመረረ ኣሕሊፍካዮ መሪሕ ወድና

ሓወልቲ ይኹን ኣካላትካ ናይ ግዜና

ደቁ ዝሸይጥ ስርዓት ንጉስ ሃገርና

ኣሕሊፉ ዝህብ ዝመክር ምስ ጓና

እንክጸልእ ጎዳጉዲ ይሰርሕ መንበሪና።

መሪሕ ይግለጾ መንነትና

እዚ እዩ ሓቂ እዋናዊ ታሪኽና

ኣብ ኽሕደት ንዝነብሩ ዜጋታትና

ስእሊ መሪሕ ይኹን ምስክርና።

ዉድቀት ንማፍያ ህግደፍ

ሃይለ ገብረትንሳኤ

ኢንድያናፖሊስ ኢንድያና

13 ሓምለ 2013