ስርዓት ህግደፍ ኣብ እዋን ዕራርቦ!

ስርዓት ህግደፍ በቲ ኣብ ውሽጡ በብግዚኡ ፈኸም ክብል ዝጸንሐ ዘይጠፍእ ሓዊ፤ ሎሚ ናብ ዕራርቦ ከም ዝበጽሐ በብእዋኑ ካብ ውሽጢ ኤርትራ ዝበጽሑና ዘለዉ ጭቡጣት ሓበሬታታት የረጋግጽዎ ኣለዉ። ብድሕሪ ህድማ ሚኒስተር ዜና ህግደፍ ነበር ዓሊ ዓብዱ፤ ሓላፊ ቁጠባዊ ጉዳያት ህግደፍ ሓጎስ ገብረሂወት /ክሻ/ ንኩላተን ኣብ ትሕቲ ህግደፍ ክነጥፋ ዝጸንሓ ቁጠባዊ ትካላት ብህጹጽ ሕሳባተን ንከረክባ ትእዛዝ ተዋሂቡወን ኣሎ።

ኣብ ስርዓት ኢሳይያስ ኦዲትን ጸብጻብ ገንዘብን ትካላት ተገይሩ ኣይፈልጥን ኢዩ። ብመሰረት እዚ ሕጂ ተመሓለሊፉ ዘሎ ህጹጽ መምርሒ፤ ኣብ ትሕቲ ኮሎኔል ወልዱ ባርያ ዝርከባ ትካላት፤ ብተስፋይ ጉራጌ እትመሓደር ኩባንያ ህንጻ ሰገን፤ ብወዲ ማኢል እትመሓደር ኩባንያ ህንጻ ገደም፤ ብሳሙኤል መሓሪ እትካየድ ትካል ሸርፊ ሂምቦል፤ ብኮሎኔል ወዲ ባህረ ዝመሓደር ሎጂስቲክስ ሚኒስትሪ ምክልኻል፤ ከምኡ’ውን ትካል ንግዳዊ ኮርፖሬሽን ቀይሕ ባሕሪን (09) ካብተን ተቐበልቲ ትእዛዛት ኢየን።

ብዘይካ’ዘን ትካላት እዚኣተን ኩሉ ኣብ ደገ፤ ክሳብ ኣብ ደብብ ሱዳንን ኣንጎላን ዝርከብ ትካላት ንግዲን ሸርፊን ህግደፍ እውን ጸብጻባተን ብህጹጽ ንከረክባ ተነጊሩወን ኣሎ። በቲ ፋሉላዊ ኣከያይዳ ስርዓት ኢሳይያስ፤ ‘ኣብ እዋን ውራ-ውራ ነብስኻ ኣይተዕብራ’ ከም ዝበሃል፤ ክሳብ ሎሚ ከም ዝፍለጥ ኮሎኔል ወልዱ ባርያ፣ ማሞ ምስ ዝተባህለ ኣብ ሮማ ቤት መግቢ ከፊቱ ዘሎ ሓዉ 11 ሚልዮን ዶላር፤ ከምኡ’ውን እቲ ንዓዲ ጥልያን ብዙሕ ግዜ ዝመላለስ ተስፋይ ጉራጌ ምስ መሻርኽቶም 25 ሚልዮን ዶላር መንዚዖም ኢዮም። ምህርቲ ወርቂ ቢሻ ካብ ዝጅምር ክሳብ ወርሒ ሕዳር 2012 ጥራይ ኣስታት 270 ሚልዮን ዶላር መእተዊኡ ኣይተፈልጠን።

ገንዘብ ናይ ምእካብ ዕማም ብዝለዓለ መልክዑ ተተሓሒዙሉ ኣብ ዘሎ ኣዋጣሪ እዋን፤ ኣብ ኩላተን ኣውራጃታት ግብሪ መሬት ብህጹጽ ንክኽፈል ትእዛዝ ተመሓለሊፉ ኣሎ። ብካልእ ዜና፤ ብሰንኪ እቲ በብመዓልቲ እናወሰኸ ዝኸይድ ዘሎ ብኣልማማ ናይ ምዕጣቕ ተግባራት፤ ዜጋታት ብጥይቶም ይሞቱ ኣለዉ። በዚ መሰረት ሰለሞን እምባየ ዝተባህለ ኣብ መንደፈራ ዝተባህለት ዓዲ ወረዳ ዓረት ከባቢ ዓዲ ቀይሕ ዝነብር ዝነበረ ጥይት ተባሪቓቶ ሞይቱ። ኣብ ሓውሲ ከተማ ሓጋዝ’ውን ዑመር መሓመድ ኣደም ዝተባህለ ብረቱ ኣብ ዝውልውለሉ ዝነበረ ግዜ ብረቱ ተባሪቓ ሰበይቱ ሞይታ ኢያ።

እዚ ኣዕናዊ ስጉምቲ ስርዓት ህግደፍ በብግዚኡ ሓያል ተቓውሞ ይገጥሞ ከም ዘሎ ንመጸና ዘሎ ሓበሬታ የረድእ። እቶም ምንጭታት ከም ዝብልዎ፤ ኢሳይያስ ብድሕሪ’ቲ ኣብ ወርሒ ሓምለ 2012 ኣብ ሳዋን ፍልፍልን ንመራሕቲ ብርጌታትን ቦጦሎኒታትን ፈልዩ ዝገበሮ ኣኼባታት፤ ኣብ ሚኒስትሪ ምክልኻል ዝነበሮ ተስፋ ከም ዝበነነ ኢዩ ተረዲኡ። ኣብቲ ኣኼባታት “ላዕለዎት ሓለፍትና ዘይብሉ ስለምንታይ ንዓና ንበይንና ኣኪብካና? ንምምሕያሽ መነባብሮ ሰራዊት እንታይ ዝተወስደ ግብራዊ ስጉምቲ ኣሎ? ስለምንታይ ጉዳይ ባድመ መዕለቢ ዘይረኸበ? መዓስ ኢዩ’ኸ ዝፍታሕ?” ዝብሉ ሕቶታት ቀሪብሉ ነይሩ ኢዩ። እቲ ኣብ ውሽጢ ስርዓት ህግደፍ ዘሎ ቅልውላው መመሊሱ ኣብ ዝዓብየሉ ዘሎ ግዜ፤ ጀነራል ስብሓት ኤፍሬምን ሜጀር ጀነራል ፊሊጶስ ወልደዮሃንስን ካብ ምዱብ ስራሓቶም ብወግዒ ደስኪሎም ኣለዉ። መበገሲ ናይቲ ምድስካል ድማ ጀነራል ስብሓት ምስ ኮሎኔል ወልዱ ባርያ ብዛዕባ ጉዳይ መካይን ብዝገበሮ ምስሕሓብ ክኸውን እንከሎ፤ ምድስካል ሜ/ጀ ፊሊጶስ ከኣ ምስ ሓጎስ ክሻ ብዝጀመሮ ህልኽ ምዃኑ ምንጭታትና ይሕብሩ።

እቲ ኣብ ስርዓት ህግደፍ ዘሎ ሕንፍሽፍሽ ናብ ኣዝዩ ኣዋጣሪ መንገዲ ገጹ ይኸይድ ኣሎ። ኣብ መንገዲ ሰላዕ ዳዕሮ ብወልዱ ባርያ ዝመሓደራ 6 ታንክታትን እሙን ሓለዋ ጋንታን ተዳልየን ኣለዋ። ኣብ ከባቢ መዕርፎ ነፈርቲ፤ ውሽጢ ከተማ ኣስመራ ዘለዋ ትካላትን ከባቢ ሚኒስሪ ዜናን ንነዊሕ ግዜ ዝነበረ ሓለዋታት፤ ብሓደስቲን እሙናት ንኢሳይያስን ዝኾና ኣሃዱታት ይትክኡ ኣለዉ።

ሓለዋ ኢሳይያስ ኣፈወርቂ ብኣዝዮም እሙናት ኣባላት ደምሒት እናተዓብለለ ይኸይድ ኣሎ። ካብቶም ንነዊሕ ዓመታት ከም ሓለዋ ኮይኖም ዘገልገሉዎ ዜጋታት ድማ ብዙሓት ደስኪሎም ኢዮም። ኣብ ግፋን ካልእ ምቁጽጻር ብሎኮታትን፤ ኣብ ምእሳር ዜጋታትን መርመራ እሱራትን እቶም ብዝለዓለ ተኣማንነት ዝሰርሑ ዘለዉ ኣባላት ደምሒት ምዃኖም ሙሉእ ህዝቢ ኣስመራ ዚዛረበሉ ዘሎ ሓቂ ኢዩ።

ሞት ክናና ንኢሳይያስ!

ድርብ ዓወት ንህዝቢ ኤርትራ!!