ፍንጫሕ መሰንገልካ ይቕበሩ
ከይበደሉ ኣብ ጒድጓድ ይሰፍሩ
ህግደፋውያን ሬሳታት ይቖጽሩ
ክሳዕ ክንድዚ ወድ-ሰብ ሓሲሩ

ብህግደፍ ዘኽቲሙ እግሪ ተኽሊ
ኣርጊፎሞ መንእሰይ ከም ቆጽሊ
ርእሲ ጅግና ደኒኑ ከም ሓኽሊ
ከስዐ ሃገር መኺኑ ከም በቕሊ

ሰብ ሓሲሩ ወሪዱ ዕዳጋ
ንምጽወታ ተሰሪዑ ሪጋ
ተበቲኑ ክቡር ዓጽመ-ስጋ
ምዓንጣ መን’ያ ’ታ ተዘሪጋ?

ወላድ ኣደ ደቃ ተመንጢላ
ህበይ’ኳ ተዕብዮም ሓዚላ
ላም’ኳ ተጥብዎም ሒሕ ’ላ
ህግደፍ ውሒጡዎም ጨካን ዒላ

እንታይ’ያ ጌራ ምዓስ ተረጊማ
ወረ ’ታይ በዲላ ንመን ኣቐይማ
ክሳዕ ክንድ’ዚ ከመይ’ዩ ጸገማ
ጒዳም ሃገር ብሬሳ ሃብቲማ

መንእሰይና ወዲ’ዘን ጸገይቲ
እዚ ኹሉ መስዋእትስ ንዘማቲ!
የብልካን ድዩ ዓይኒ መጠመቲ?
ንስጋ ሰብ ዝበልዕ መንግስቲ!

ወዲ’ዚ ተኳሳይ በታኽ ፈትሊ
ኣበይ ከይዱ ቅልጽም ናይ ትማሊ?
ንዘይኣምኑ ዘፍዘዘ ከም ምስሊ
ንወረርቲ ዘርገፈ ከም ቆጽሊ

ክንልምኖም ንሳቶም ተዀብቲ
ካብ ዓውድናስ ድማ ብውንጭሕቲ
ካብ ኲምርናስ ንእሽቶይ እንዳእቲ
መንገደኛ ኰይኑ ብዓል ርስቲ!
ኣለልዮም ናይ ህግደፍ ሰራዊት
ብድሕሪት ዝነኽሱ ከም ዕንቅርቢት
ኣብ ማእከልካ ዝውልዑ ክርቢት
ኣይትዘንግዕ ኣብዘይረብሕ ትጽቢት

ጒድ ረኺባ ሃገርካ ኤርትራ
ሃል-ሃል ኢላ ነዲዳ ሓሪራ
ተበሊሉ ወዮ ድሙቕ ሕብራ
ብህግደፍ ኣምላኾም ሰብ ጽሩራ

ተበገስ መንእሰይ ደጊም ተበራበር
ስቕዶ ‘ብሃል ማይቤት ክሰባበር
ስርዓት ዓደቦኻ ካብ ዝቕበር
ተወደቡ ዝብል ልሳን ግበር

ጅግንነትካ ዓለም ዘንፈጥፈጠ
ኣጻብዕካ ጥይት ዝሸምጠጠ
ፈሪሁዶ ‘ብለካ ዘይፈለጠ
ዘንጊዕካ’ምበር ብተመን ውሻጠ

ጎበዝ ንቐል ናባኻ’ዩ ውራይ
ኣብ ገዛእ ገዛኻስ ዳርጋ ክራይ
ህግደፍ ክኣስረካስ ትብል ሕራይ
ወድ መንከ ክትብሃል ዳሕራይ?

እንታይ ተሪፉና ድሕሪ ደጊም
ዓይኒ ተገሲሙ እዝኒ ሕትም
ንዓ’ሞ ተበገስ ብደም ፈርም
ህግደፍ ክጠፍእ’ዩ ክብል እርም

ሰብዶ የለንዩ’ታ ብዓል እንዶ?
ተዋሪድና ካላእ ትዋረዶ
ሃገር ከመሓድር በጋሚንዶ!
ድምር ተወዓልካስ ኩሉ ባዶ

ወድ-ወደይ ተኲሶ ዝባህልና
ዓዀዃይ-ዓዀዃይ ከም ቀደምና
መንእሰይ ተበገስ ከይጸነትና
ዕላማ ስዉኣት ተርጒመልና!!!

ረድኢ ክፍለ (ባሻይ)

ጒንበት 10-2012