ኣብ ዕሩቕ ዝባነይ ፡ ወርቂ ኣብ  ክሳደይ !

ናጽነት ...............

ትረከ ናጽነት........!

ኣብ ዕሩቕ ዝባነይ
ወርቂ ኣብ ክሳደይ
ብሩር ኣብ ሕዛበይ
እንታይ ክዓብሰለይ ።

ኣብ ሕዙን ልበይ
ጓይላ ኣብ ደንበይ
ዕልልታ ኣብ ዓደይ
እንታይ ክዓብሰለይ ።

ኣብ ጥሙይ ከብደይ
ኣብ ኩርኳሕ ንእደይ
እንተተሰለመ ቆፎይ
እንታይ ክዓብሰለይ ።

ኣብ ከብድኻ ሓምሊ
ኣብ ጸጉርኻ ጠስሚ
ኣብ ዝባንካ ቁስሊ
ኣይሓኸለ ኣይዓጽሚ ።

ኣንቱም ህዝቢ.....!

ኣየናይ'ዩ እቲ ናጽነት
ኣየናይ'ዩ እቲ ሓርነት
ኣየናይ'ዩ  እቲ ገነት
እቲ ዘጃህር ኣንነት ?

ኣየናይ'ዩ እቲ ናጽነት
ኣየናይ'ዩ እቲ ክብረት
ኣየናይ'ዩ እቲ ቅሳነት
እቲ ዘመክሕ ልዕልነት?

ወይ ናጽነት...........

ክንዲ ወላዲ ዝተገርፈ
ክንዲ መሰል ዝተጋህሰ
ክንዲ ተስታይ ዝዓመሰ
ክንዲ ኣንጉዕ ዝፈሰሰ

ኣየናይ'ዩ እቲ ናጽነት..

ክንዲ ህልቂት ስድራቤት
ክንዲ ዕርቃን ጥሜት
ክንዲ ሕሰም ምረት
ቶሞኽሊኻ ናጽነት !

ቶባእ !................

ክንዲ ሕሰም መከራ
ክንዲ ሕስራን ዓዘራ
ክንዲ ኣደራዕ መከራ
ናጽነት ንስለ ጃህራ።

ትረከ ናጽነት........!

ኣብ  ዕሩቕ ዝባነይ
ወርቂ  ኣብ ክሳደይ
ብሩር ኣብ ሕዛበይ
እንታይ ክዓብሰለይ ።

እወ...................

ስሉም ቆፎ ኣየጃህር
ስሉም ጋቢ ኣየዳህር
ሃብታም ዘመድ ኣየጃህር
ዓሻ ተስፋ ኣየናብር

ትረከ ናጽነት.........

ሕልሚ ለይቲ ኣየንቅሕ
ሃብቲ ጓና ኣየርብሕ
ቅጭን ጋቢ ኣየስብሕ
ጃህራ በጠጥ ኣየመክሕ

ኣብ ዕሩቕ ዝባነይ
ወርቂ ኣብ ክሳደይ
በራውር ንሕዛበይ
እንታይ ክዓብሰለይ
==================
ናጽነት መናበሪ እንበር፡ መጃሃሪ ኣይኹን !

የርህዎ ኣምላኽ